ناس ما تحمدش ربها

ايه يعني لما تكون البيوت قريبة جدا من بعضها... يعني بايدك تسلم علي جارك في اخر الشارع.
بنخلق جو من المودة.

ايه يعني لما يكون جنبك كوم او كوميين زبالة.....علشان تتعود علي الحشرات و تاخد مناعة من امراضها بعد كده

ايه يعني لما الدنيا تغرق مجاري من حواليك.....علشان تتعلم العوم و لو حبيت تسافر في عبارة..تغرق العبارة و انت تعوم و تعيش.

ايه يعني لما تشوف النور في الصبح بس لما الشمس تطلع...ماهو علشان عينيك ما تتعبش و حاسة النظر تبقي عندك قوية.

ايه يعني مش لاقي شغل....ماهو من حقك تستريح بعد الجامعة و كدا كدا بتشتغل او ما بتشتغلش كله محصل بعده, يعني الماهية يادوب موصلاتك.فخليك مرتاح.

ايه يعني مش لاقي تأكل ولادك....خليهم يتعلموا الصبر و يبقوا رجالة و محدش بيموت من الجوع.

ايه يعني بيطلع عينك في الجري ورا الاتوبيسات و بهدلة المواصلات....خليك رياضي و العقل السليم في الجسم السليم.

حقيقي ناس ما بتحمدش ربها.