فرصة

الحقيقة اشعر بالحزن كلما سمعت القول بان الستات ميعرفوش يسقوا...........مين اللي قال كده ؟ده احنا حريفة في السواقة بس هو سوء حظ

انا عن نفسي مسوقش ابدا ورا و لا جنب واحدة ست..مش خوف لا سمح الله بس علشان ميكونش سوء الحظ من نصيبي.

انا عن نفسي الحمد لله معملتش غير ثلاث حوادث و انا بتعلم السواقة.واحدة منهم خبطت عربية واقفة ثلاث مرات و انا بحاول اقف صف تاني جنبها و اظبط وقفة العربية و طبعا مكنتش غلطتي..اللي كان واقف مكنش راكن صح.

والتانية جيت ادوس فرامل دست بنزين فالعربية طلعت علي الرصيف وخبطت في السور و اللي كان بيعلمني السواقة اغمي عليه و انا قعدت اعيط لاني افتكرته مات و قلت رحت في خير كان و الحادثة الاخيرة مش هحكي عنها علشان متقولوش اني مبعرفش اسوق.

الحقيقة حتي جيرانننا عارفين و متاكيد من براعتي في السواقة لدرجة ان واحد منهم قال لي..انا اول ما بشوفك راحة تركبي العربية بطلع و بطلع ولادي في البيت بسرعة...............بصراحة مش فاهمة ليه بس قلت اكيد نوع من الاطراء.

و الحقيقة اول ما اتعلمت السواقة كنت بخبط بس في مرايات العربيات و انا ماشية و اسيب كارت بابا علشان هو يتفاهم مع الناس لما كروت بابا ملت البلد

حتي بابا مش عارفة غير رايه ليه ؟؟ كان بيقول لي هاتي عربية ناعمة و لطيفة بعد ما تتعلمي..ركب معايا مرة واحدة قال لي يادوبك نص نقل او هامر....مش عارفة ليه ؟ يمكن علشان مبستعملش الفرامل الا نادرا او مببصش في المرايات.........بصراحة انا عندي خمس مرايات في العربية اتنين في الجنب وواحدة في النص و اتنين للمكياج.....مش معقول هبص في خمس مرايات فاستغنيت عنهم و ببص في مرايات الميكب.

دلوقتي الحمد لله ربنا كرمني و سواقتي بقت اروع من الاول بشوية صغيرين و انا قررت ابيع العربية اللادا لانها استحملت كتير اوي.الحقيقة دي فرصة لو حد عاوزها.........هي لادا ممتازة يعني تدي كده شكل اي عربية هاتش باك.....و والله من غير دعاية لها هي طلعت علي كل ارصفة مصر و هي زي الحديد.علي العموم انا مش طالبة كتير..انا هبعها بالف جنيه بس علشان الباقي يادوب تصلحها لو نفعت و ممكن اقسط الفلوس كمان.بس انا مضطرة ابيعها بسرعة فياريت متضيعوش الوقت و متضيعوش الفرصة....و العنوان معروف اول ما تلاقوا شارع فاضي و العربيات كلها بسرعة بتحاول تمشي و عربية يتيتمة في الشارع ده تاكدوا انها عربيتي.